ҚАЗАҚСТАН МЕН БАӘ БІРЛЕСКЕН ИНВЕСТИЦИЯЛЫҚ ПЛАТФОРМА ҚҰРАДЫ

 

Келіссөздер барысында ҚР Президенті Нұрсұлтан Назарбаевтың БАӘ-ге 15-16 қаңтардағы ресми сапары барысында қол жеткізілген, жоғарғы деңгейдегі уағдаластықтарын іс жүзіне асыру жолдары қарастырылды.

Тараптар энергетика, мұнайхимия, атом өнеркәсібі, көлік және логистика, әскери-техникалық салалардағы ортақ жобаларды дамытуға дайын екендерін растады.

«Бәйтерек» холдингі мен «Mubadala Development Company PJSC» Қазақстан аумағы мен өзге көрші елдердің басым нарықтарындағы инфрақұрылымдық және өзге де жобаларды бірлесіп қаржыландыру үшін жақын арада өзара инвестициялық платформа құруға келісті.

ҚР мен БАӘ-нің энергетика министрліктері ҚР-да мұнайгазхимия кешені құрылысының жобасына тараптардың қатысу мүмкіндігін талқылады.

«Қазақстан темір жолы» ұлттық компаниясы мен «Etihad Rail» ұлттық теміржол компаниясы БАӘ мен үшінші елдерде бірлескен инфрақұрылымдық жобаларды жүзеге асыру мәселелерін талқылады.

БАӘ атом энергиясы жөніндегі корпорациясы «Қазатомөнеркәсіп» ҰАК»-мен ядролық энергияны бейбіт түрде пайдалану саласында екіжақты қарым-қатынасты дамытуға ниет білдірді.

Әмірлік тарабы Қазақстан Республикасы Қарулы Күштері әскери оқу-жаттығу орталықтарының инфрақұрылым нысандарын инвестициялау мәселесін қарастыруға мүдделілік танытты.

Әмірлік тарапынан келіссөздерге энергетика министрі Сухейл Мухаммед аль-Мазруи, Абу-Даби Атқарушы кеңесінің мүшесі, «Мубадала Девелопмент» компаниясының Бас атқарушы директоры, БАӘ атом энергиясы жөніндегі корпорациясының басқарма басшысы Халдун Халифа аль-Мубарак, Абу-Даби қаласының мэрі, «Etihad Rail» ұлттық теміржол компаниясы Директорлар кеңесінің төрағасы, инженер Ауд Муршид аль-Мурур, қауіпсіздік пен қорғаныс мәселелері жөніндегі сыртқы істер министрінің орынбасары Фарис аль-Мазруи және ҚР-дағы БАӘ елшісі Мухаммед аль-Джабер қатысты.

Кездесуге қазақстандық тараптан Энергетика министрі Қ. Бозымбаев, Қорғаныс және аэроғарыш өнеркәсібі министрі Б. Атамқұлов, «Қазақстан темір жолы» ҰК» АҚ басқарма төрағасы Қ. Алпысбаев, «Бәйтерек» ҰБХ» АҚ басқарма төрағасы Е. Досаев, «Қазатомөнеркәсіп» ҰАК» АҚ басқарма төрағасы А. Жұмағалиев және БАӘ-дегі Қазақстан елшісі Қ. Лама Шариф қатысты.

 

Қайнар көзі: primeminister.kz  


Желілерде бөлісу:

  • 3721